Europa, un novo soplo de esperanza
Moi ao contrario do que se poidera pensar, a nosa ausencia de onte non foi pola resaca do Primeiro de Marzo, senón por problemas co servidor do noso blogue.Convenientemente aclarado, podemos pasar ao tema que hoxe nos preocupa.
SOS Serra da Groba volta ao ataque, desta vez acudindo á UE. Vendo que a Xunta non vai facer nada por evitar a instalación do parque eólico na Groba, o recurso de tentar a inclusión na Rede Natura semella unha alternativa interesante para evitar que entremos no mapa eólico galego.
Quizáis coa modificación que tenta a Xunta que permitirá recaudar aos concellos, vía IAE, impostos aos parques eólicos, os concellos se repensen a súa postura. Tampouco axudou nada a visita que se realizou a un parque eólico próximo, onde se podían ver vacas pastando baixo os aeroxeneradores.
O traballo de SOS Serra da Groba estase a dificultar día a día, sobre todo porque a política enerxética galega está mudando progresivamente cara as renovables, seguindo un modelo de desenrolo sostible e posibilitando que a Administración galega teña poder de decisión. O parque eólico Albariño I é o derradeiro da anterior lei. Pero o maior inconvinte que teñen aqueles que manifestan a súa actitude crítica coa instalación de aeroxeneradores nos montes é que non esgrimen unha alternativa, ou ésta non chega ao común das xentes. Se a instalación fora dunha central térmica ou nuclear, toda a comarca estaría en pé de guerra, pero non é así. A crítica é residual porque a enerxía eólica non é impopular. Namentres esta concepción permaneza na sociedade, os parques eólicos terán moi poucos opositores.
chuzame - 
Aclarémonos. SOS Groba non está en contra da enerxía eólica. SOS Groba está en contra da instalación dun parque eólico na serra da Groba por que considera que pon en perigo valores moito máis importantes que os recursos enerxéticos que se pòidan xerar. Hai en perigo certos valores non considerados que non se poderían recuperar nin pagar nin con todo os euros que se ganen nos 30 primeiros anos de vida do hipotético parque eólico Albariño I.A enerxía eólica pode ser un bo recurso se se aproveita ben e da a enerxía que necesita io, noso rural, e non unha fábrica de producción para exportar ao exterior. Paguen máis ou pagune menos, os muíños van producir o mesmo dano ,mentres a súa ubicación vaia onde se ten pensado.
Comentario por cerne — 4 marzo 2008 @ 13:50
Efectivamente, os argumentos e obxectivos de SOS Groba non están a chegar á cidadanía, salvo a certas elites culturais e o endogámico círculo ecoloxista.
3.000 sinaturas están moi ben, pero a sociedade non se está a movilizar porque a Groba non ten valor para a cidadanía. É maioritaria a xente que pensa que, modificando lixeiramente o proxecto (respeto aos petroglifos non catalogados e retirada dos que se vexan desde Oia), incluso se poría en valor o entorno. ¿Verdade ou mentira? Intesante debate.
Comentario por baionaconsciente — 4 marzo 2008 @ 20:18
“O traballo de SOS Serra da Groba estase a dificultar día a día, sobre todo porque a política enerxética galega está mudando progresivamente cara as renovables, seguindo un modelo de desenrolo sostible ……”
A politica galega enerxética mudando a renovables!!!!! Debe ser na Galitzia polaca porque na atlántica…..
Que me digan a min en que momento se pecharon ou reduciron produción as térmicas galegas(entre as máis contaminantes de Europa), que me contesten cando se plantexeou mellorar as redes enerxéticas para que non se perda polo camiño perto do 20% da enerxia producida no país, que me conten se algunha vez entendeuse que a produción eléctrica non é un negocio senón un servizo público,cando deixaremos de ser unha potencia adicada a exportación de enerxía a cambio de nada ….a criación destes parques eólicos e solares non obedece máis que ao afán de xerar e xerar máis cartos por parte do capital, non hai mudanza a renovabeis por que non hai cambio de modelo enerxético, e poñer sobre o xa existente novas infraestructuras (subvencionadas ademais)coas que uns a costa do patrimonio de todos van encher os petos de cartos, nós mentras miraremos os molinillos e sentiremosnos D. Quixote. Saude
Comentario por Fon — 5 marzo 2008 @ 10:44
É maioritaria a xente que pensa que, modificando lixeiramente o proxecto (respeto aos petroglifos non catalogados e retirada dos que se vexan desde Oia), incluso se poría en valor o entorno.
E de onde se sacou esta enquisa???? Foi alguén casa por casa ou preguntouse somentes as directivas das CCMM (poderoso caballero)???
Está realmente informada a cidadanía de como queren destruir a Groba???
Por certo se o equilibrio natural se reducira a vacas pastando….
Outro Saudo
Comentario por Fon — 5 marzo 2008 @ 10:53
Estimado Fon, non convén alterarse. Moitas das túas apreciacións son acertadas. Mesmo hoxe mesmo poidemos ver na prensa que o 31% da enerxía que xera Galicia expórtase.
Tamén é evidente que namentres as enerxías renovables non podan satisfacer ao cento por cento as nosas necesidades enerxéticas, teremos que depender de enerxías contaminantes.
Concordo ao cento por cento tamén que a enerxía é un servizo público e non un negocio. Que llo digan a aqueles que liberalizaron o sector “para reducir prezos”. O que non se pode cargar as tintas contra unha Administración que quere mudar progresivamente as cousas. ¿ou é que hai quen non quere mudar as cousas e seguir detrás dunha pancarta porque sí? Convén reflexionar sobre isto para que as demandas reais non estean contaminadas.
Por certo, negar que a mensaxe de SOS Groba non está chegando á cidadanía é negar a realidade. Que SOS Groba convoque unha manifestación contra o parque eólico en Baiona e contamos xuntos os baioneses que asistirán.
Comentario por baionaconsciente — 5 marzo 2008 @ 12:06
A convocatoria da manifestación foi en Santiago dentro da rede Galiza non se vende.
Comentario por Pinto — 5 marzo 2008 @ 13:10
Sen alterarse (ou habería que facelo).
Non convén, dende o meu punto de vista, contrapoñer enerxias renovabeis e contaminantes, un exemplo, a enerxía hidráulica e renovable, pero non contaminante???? Só hai que botarlle un ollo ao Miño e ver o bochornoso impacto ambiental a que sufriu con tódolos encoros dende Frieira a Fonmiñá. Desgrazadamente a contaminación non só se debe medir pola cantidade de residuos xerados.
Por outra banda, que carga tintas contra a administración???? O tema era A Groba, e neste caso somentes se pode dicir que queren facer unha desfeita nunha xoia (por moi dañada que este)natural, paixaxistica, de patrimonio,… do suroeste do pais,só un exemplo, os kilometros de pista modificarian notablemente o sistema hídrico da serra, o que afectaría notablemente a todo o ecosistema da serra. E agora que o penso,.. alguén informou disto aos veciños e veciñas de Oia e Sabarís que sofren as inundacións dos outonos.
Por certo, negar que a mensaxe de Eurovento non está chegando á cidadanía é negar a realidade. Que Eurovento convoque unha manifestación a favor do parque eólico en Baiona e contamos xuntos os baioneses que asistirán.
Comentario por Fon — 5 marzo 2008 @ 17:14
Comezo polo final. Eurovento non precisa ter á opinión pública a favor, simplemente cumplir a legalidade, e coa anterior lei parece que cumpría.
Enténdase que estamos a xogar a ser avogados do diaño. Todos preferimos que A Groba se poña en valor, se recupere para o seu disfrute, pero non ten porqué ser incompatible coa instalación dun parque eólico, pode que sexa a oportunidade de que mans privadas axuden dunha vez a conservar o noso. Ahí debe radicar a crítica, non en si debe ou non debe haber un parque eólico.
Hoxe poidemos ler en El País que as enerxía renovales xa cáseque supoñen o 60 % do consumo eléctrico, iso quer decir que non se precisaron más prantas térmicas para cubrir as nosas necesidades. Se non hai alternativa, non se pode eliminar o mal. A Xunta adica 27 millón de euros a aforro enerxético (o 80%) e enerxías renovables (20 %). Vese que a aposta é por mudar a política enerxética galega, máis difícil será mudar os hábitos da cidadanía (iso levará algo máis de 4 anos ¿non?, baixo o risco de que alguén diga que se están a impor as cousas).
Concordamos ao cento por cento o apuntado sobre o sistema hídrico, un punto a ter en conta na construcción do parque eólico. Os termos “desfeita” para un parque eólico e as súas pistas e “xoia” para un monte desfeito parécenos inapropiado. ¿Cál é a alternativa para rexenerar a Groba?
Con esta controversia simplemente queremos facer reflexionar sobre os métodos e o debate que se pode xerar co tema. Semella que somentes se pode posicionar ún contra Eurovento ou a favor, cando desde BC reclamamos sempre o dereito individual de cada un a pensar por sí mesmo. O punto de encontro atópase no medio do camiño (ou no centro da gráfica do desenrolo sostible).
Finalmente, tomamos nota do apuntado sobre a contraposición de contaminantes-renovables, demostrado queda que a enerxía hidráulica é de todo menos bo para o ecosistema.
Comentario por baionaconsciente — 5 marzo 2008 @ 20:13
Unha opinión máis en http://sosgroba.blogspot.com/
Comentario por píntiga — 5 marzo 2008 @ 21:30
Evidentemente a falta de capacidade de autocrítica non é un mal exclusivo da clase política, pero en fin.
Para que non haxa malentendidos, desde BC sempre defendimos que o proxecto de parque eólico non era adecuado na Groba, se ben os argumentos que se esgrimen quizáis non sexan os máis adecuados. ¿Porqué si ou non? ¿E os termos medios?
Por certo, a anotación en resposta á nosa nos alaga, pero volve a fallar na forma. Demasiado denso e afastado da maioría da xente. Para que unha mensaxe chegue á maioría debe ser conciso, veraz e sinxelo.
Se a actualidade o permite, mañá falaremos do blogue de SOS Serra da Groba. Un saúdo e ánimo.
Comentario por baionaconsciente — 6 marzo 2008 @ 11:20